القاهرة - " وكالة أخبار المرأة "

رغم أنها ليست الواقعة الأولى التي تقوم فيها فتاة بتصوير أحد المتحرشين ونشر الصور عبر الشبكات الاجتماعية، إلا أن فتاةً نجحت في استخدام فيسبوك لتوقيع عقوبة الفصل من الوظيفة ضد شاب تحرّش بها أمام مداخل أحد الأسواق التجارية الكبرى.
بدأت الأزمة قبل يومين، 22 أغسطس/آب، حينما تعرضت فتاة وشقيقتها الصغرى للتحرش من قبل شابين أمام أحد مداخل City Stars بالقاهرة، وعند طلبها المساعدة من أفراد الأمن، لم تجد تعاوناً، وهو ما أثار سخرية المتحرش منها، فما كان من الفتاة إلا أن قامت بتصوير الشاب عبر كاميرا هاتفها الجوال لتصعيد الأمر عبر الشبكات الاجتماعية.
ربما لم يكترث الشاب بما تفعله الفتاة مثلما بدا في مقطع الفيديو، غير أن تفاعل الجمهور عبر الشبكات الاجتماعية للوصول لمعلومات تفيد بشخصية الشاب جاء مفاجئاً، حيث ساعدها البعض في جمع المعلومات حول وظيفته والشركة التي يعمل لديها، وأضاف البعض معلومات شخصية عنه.
بعد رحلة البحث من قبل الجمهور، جاءت المعلومة الأولى أن الشاب يعمل في أحد متاجر العالمية لبيع المواد الترفيهية والأجهزة الإلكترونية بـ City Stars، غير أن الشركة نفت تماماً علاقتها بالشاب المذكور، مشيرة إلى أنه ليس أحد أفراد فريق العمل لديها ولا الموردين.
ماذا كتبت Samar Qamara‎
الشخص الناقص الي بيرقص في الصورة دا متحرش.. كنت انا واختي الصغيرة داخلين سيتي ستارز الساعه ٦ امبارح. ومعدية من جنب بوابة ٨ لقيت البني ادم دا واقف مع صاحبه الي في الصورة وبيقولو شايف المزة الي معاها بنت صغيرة؟ امشي جنبها وبعدها خش يمين على اساس انه بيقول نكته وقعدو يضحكو.. انا تجاهلته عشان مش عايزة اتخانق قدام اختي.. وكملت لقيته جاي عليا وبيقولي معلش يامزة متزعليش اني قلت عليكي مزة. وقعد يضحك تاني هو وصاحبه.
دا طبعا حصل وفي ٤ او ٣ افراد امن سيتي ستارز قاعدين بينهم وبيننا ٣ متر وعاملين مش واخدين بالهم.. يعني هو مصمم يستفزني. فأنا زعقت وقلتلو انت شغال فين؟ هو كان في حد بيسلمه الكراتين الي في الصورة دي من جوة سيتي ستارز. فقالي شغال في سيتي ستارز ورريني هتعملي ايه وقعد هو والاهبل التاني يتريقو ويقولو دي مريضة وماصدقت اني عاكستها.
رحت للامن الي كان ناقص يجيب فشار ويتفرج. قلتلو انت موقفك ايه من الي بيحصل المفروض ان دا واحد شغال هنا وعادي بيعمل قدامك كدا؟ هو عمل نفسه مش واخد باله وقالي انا مليش دعوة بأي حاجة تحصل برة مبنى سيتي ستارز.. لما لقيت اني مش هستفيد حاجة طلعت الموبايل وصورت الشخص دا وكان بيرقص وانا بصوره ومش عايز طبعا يبين وشه وبيقولي اقلع طيب عشان تصوريني وانا واخد تان؟ وبردو الامن واقف بيتفرج.
سبتهم ورحت بوابة ٧ لقيت جارد اسمه مصطفى لما عرف الي حصل ووريته صورة الولد قالي شكله مش غريب وورا الصورة للي واقفين قالوله بنشوفه كتير يعني اكيد شغال في سيتي ستارز.. قالي لو هو شغال هنا هجبهولك ونروح مكتب الامن ونشوف هنعمل ايه وارجعي لوليد "الامن الي كان بيتفرج" قوليلو مصطفى بيقولك تمسك الولد دا وتوديه مكتب الامن.
رجعت تاني لقيت الولد لسه واقف وبيكمل تريقه وبيقولي مزة بتدايقك؟ طب يامزة..تجاهلته تاني عشان مديش فرصة لحد يغلطني ودا كان قرار غلط الموضوع كان هيخلص بإني امسح بكرامته الارض او اقلع الجزمة واضربه بيها بما ان في جميع الحالات الامن مش هيتدخل. المهم قلت لفرد الامن الي اسمه وليد انه لازم يدخله مكتب الامن.. قالي ثواني واتصل بحد وقاله امسكه ولا لأ؟ .. وواضح انه قاله سيبه ملناش دعوة.
قبلها الظريف الي كان بيرقص ويضحك اول ما لقى الامن جاي يكلمه وقف عادي جدا وقال انه شغال في virgin واعاكس واقول الي انا عايزه وخليها توريني هتعمل ايه.
الامن سابه وراح يتكلم في التليفون راح الولد قايل لصاحبه هي البت دي شتمتني بأمي؟ قاله اه هزقتك وقالتلك يا ابن **** .. راح قايل كدا ليا حق اشتم واقولها انها ***** وقعدو يضحكو كانهم شاربين حاجة الموضوع مكنش طبيعي خالص واختي الي عندها ١١ سنة سمعت شتيمة بتتقال لاختها عادي. وانا بردو فضلت متمسكة بقراري الساذج اني مشتمش واهزقو ورحت زعقت للامن قلتله انت سمعت هو شتم قال ايه انا مش همشي من هنا غير لما توديه مكتب الامن ونروح القسم اعمل محضر.. رد بكل برود قاللي هخلص التليفون وهوديه. وببص لقيت الولد بيخلع من المكان وساب الكراتين مع صاحبه وبيمشي بعيد. قلت للامن دا بيمشي روح امسكه!! قالي الي في بوابة ٧ هيمسكوه. وطبعا مفيش حاجة من دي حصلت والجبان الي كان بيقول انا راجل غصب عنك وهفضل واقف لغاية مااشوف اخرك ومش هتحرك جاب ورا ومشي لما سمع كلمة محضر.
بعد مامشي رحت لvirgin ووريت الي شغالين هناك صورته قالولي اول مرة نشوفه. بس ممكن يكون supplier لينا وفي واحد فيهم قالي ابعتيلي صورته وانا لوشفته هعرف اسمه بالكامل وهكلمك. معرفش هو فعلا مش عارفينه ولا لأ وهيهتمو ولو شافوه هيكلموني ولا لأ. بس مكنش قدامي غير اني اصدقهم.
وبعدها رحت لمكتب الامن وقلتلهم الي حصل قالولي المفروض مش من حق الامن يتدخل بس لو الولد دا ممكن يكون شغال هنا ومن الناحية الانسانية وانك بنت وعيب يحصل كده كان لازم عالاقل يجيبهولنا ونشوف مين مديره ونوصله بس الكنترول قالوله ملكش دعوة. وهو نفذ كلامهم. وقالولي نفس الكلام: لو شفناه هنكلمك وتابعي معانا.
وعشان انا متاكدة ان محدش هيكلمني مفيش قدامي غير اني احط صورته والفيديو الكوميدي بتاعه عشان لو وصل لاهله او الناس الي شغال عندهم يعرفو انه متحرش وبجح وعرة.
انا سبت حقي في مرات كتيرة. بس المرة دي مش هوصل رساله اختي الي عندها ١١ سنة وشافت الي حصل اني ممكن اتعاكس وامشي عادي كانني مسمعتش حاجة عشان مش هحب اشوفها لما تكبر بتطنش اي كلمة تسمعها في الشارع ومش بتحاول تجيب حقها مهما كانت الكلمك الي اتقالت عبيطة.
Update: انا متشجعتش لاني اعمل بوست. انا في العادي بجيب حقي وانا واقفة بس بما اني مقدرتش اعمل دا عشان اختي. قلت اكتب بوست وابقى عملت الي عليا زي مافي ناس نصحوني.. انا مذهولة من كمية الناس الايجابية الي شايفة اني صح ولغاية دلوقتي محدش قالي انتي مكبرة الموضوع وغلطانه انك رديتي عليه غير ٣ او ٤ اشخاص.
تاني حاجة الاستاذ وانا بصوره كان بيقولي ايوه اعملي زي البنات الفاضية الي بتفرح انها اتعاكست وتنزل صور الي عاكسها واشهريني انا بحب اتشهر .. انت فعلا بدات تتشهر وبقيت وجهة مشرفة لاهلك وشغلك
تالت حاجة للبنات ابوس اديكم ماتسكتوش عالعك دا الي بيقولك انهاردة كلمة عبيطة بكرة هيقول كلمة زباله لبنت تانيه بسبب انك سكتتي وكبرتي دماغك..
اخر حاجة store manager من virgin فرع سيتي ستارز كلمتني واكدتلي ان الشخص دا مش شغال في virgin ومش supplier.. وفي كزا حد كلمني واكدلي ان الولد دا شغال في محل تاني في سيتي ستارز مش هقول اسمه غير لما اتاكد واشوف ايه الاجراء الي هخده
رد شركة Quality Egypt
بيان هام من مدير فروع شركة كواليتى للتوكيلات التجارية
فوجئنا اليوم بصور منتشرة على مواقع التواصل الاجتماعى لاحد الموظفين لدينا فى فرع سيتى ستارز وقيامه بافعال غير لائقة مع احد عملاء المول امام بوابة 8 حسب الصور و الفيديو المنشور ولذلك قررنا ايقاف الموظف عن العمل و تحويله للتحقيق مع توصية بالفصل
وتعتذر ادارة الشركة لجميع عملائها الكرام
"تحديث"
بعد انتهاء التحقيق تم فصل الموظف نهائيا